Tsikaritra fa mihamahazo vahana indray ny fandrobana ireny mpamongady vola amin’ny alalan’ny finday ireny amin’izao fotoana izao. « Orange Money » iray ao amin’ny fokontany Ambolomadinika 13/31, any Toamasina indray no nisy nanafika amin’ny andro mazava, ny marainan’ny talata voalohany volana desambra, tamin’ny 10 ora. Jiolahy telo nitondra kodiaran-droa marika Jog miloko mainty sy Bwiss miloko volotany, nirongo fitaovam-piadiana no nanantanteraka ny fanafihana. Nipoapoaka ny basy tamin’ny fandalovan’izy ireo teny an-toerana nampirohorohoana ireo manodidina. Tetika izay tena nahomby tokoa satria vaky nandositra nanavotra ny ainy avokoa ireo olona vao naheno ny feom-basy izay tena nanakoako.

Mbola notifirin’ireo olon-dratsy ihany koa ny tovolahy 21 taona, mpiambina izany toerana izany. Naratra mafy ka lasa tamin’izany ny vola mitentina 600 000 ariary izay natokana ho hofan-trano. Nilefa nianavaratra ny toerana nanaovana ny fanafihana ireo jiolahy avy eo sady mbola nanapoaka basy indroa, araka ny loharanom-baovao.

Raha tsiahivina dia jiolahy miisa 3 ihany koa nirongo zava-maranitra no nanafika « Airtel Money » iray, tany Madiotsifafana, Ambatondrazaka, ny faran’ny volana novambra, tamin’ny 2 ora maraina. Lasa tamin’izany ny lelavola 400 000 ariary sy solosaina ary kamera natao hanara-maso izany toerana izany.

L.N