Zazavavy kely vao 8 taona monja no maty tao amin’ny ivo-toerana fitaizana zaza kamboty iray, any Antsirabe, ny talata lasa teo. Araka ny filazan’ny mpitsabo nijery ny razana dia noho ny kapoka tafahoatra nihatra taminy no nahafaty azy. Nanaporofo izany ny fahitana ratra izay nanerana ny vatany. Voalaza fa ireo mpitaiza azy ao amin’ny akany ihany no tompon’antoka tamin’io vono sy ratra io fa tsy mbola tsy fantatra kosa hoe iza? Ny taona 2008 no niditra tao amin’io akany io ilay zazavavy kely.

Naato ny ministeran’ny Mponina sy ny fiahiana ny vehivavy nanomboka ny talata hariva kosa ny asan’io ivo-toerana io satria izy nantenaina hikarakara sy hanavotra ireo zaza kamboty sy tsy manana fianakaviana miahy indray no mahavita mamono mahafaty ankizy ao aminy. Ireo ankizy notaizaina tao kosa nafindra avy hatrany any amin’ny akany mitaiza zaza kamboty iray hafa ary nozahana tsirairay avy tao amin’ny mpitsabo manokana mba itarafana ny toe-pahasalamany.

Manoloana ity raharaha ity dia manenjika ireo tompon’andraikitra ao ny eny anivon’ny Fitsarana. Misokatra noho izany ny fanadihadiana ataon’ny polisy misahana ny fiarovana ny ankizy tsy ampy taona, amin’ny fikarohana ny tompon’antoka amin’izany. Efa mandeha ihany koa ny fikarohana  ny ray aman-dreny niteraka io zazakely io amin’izao fotoana izao.

Laurena Nany