Tsy fantatra avy aiza ny fiandohan’ny afo fa tanàna iray ao Antetezandravina Ambaritelo, any Sambava no lasa lavenona, ny alatsinainy lasa teo, tamin’ny 2 ora tolakandro. Mihorohoro tanteraka ireo mponina any amin’ity toerana ity amin’izao fotoana izao. Tsy misy sahy mampirina entana sy matory ao an-trano izy ireo.

Eo ireo efa tsy mahavita asa, ireo mpianatra indray tsy mandeha any an-tsekoly intsony  sao amin’ny fotoana tsy maha eo azy ireo no tonga ny afo. Trano miisa 5 no indray may tamin’ny fotoana nitrangan’ny fahamaizana. Araka ny loharanom-baovao avy any an-toerana dia misy fofona mandalo ny tanàna alohan’ny hisian’ny loza ary minitra vitsy aorian’izay dia milatsaka ao ambony tafo ny afo. « Tsy mila fohanana rano intsony ny trano. Ny mahagaga ihany koa dia misy zavatra tsy hita maso mitoraka eran’ny tanàna izay tsy hay fihaviana », hoy hatrany ny loharanom-baovao.

Ahiana ho fipoahan’ny volikano kosa ity afo mandoro ny tananan’Antetezandravina Ambaritelo ity satria vao tsy ela izay dia nisehoan’ny horohoron-tany mahery vaika, tany Sambava. Tsy sambany ihany koa no nisehoan’ny zavatra toy izao tany an-toerana hoy ireo olobe satria efa nisy tranga mitovy tamin’io ny taona 2014, tao Andrahanjo. Manao antso avo amin’ ireo tompon’andraikitra noho izany ireo mponina tsy manan-kialofana hijery akaiky ny momba azy ireo sy ny hanaovana fanadihadiana lalina mahakasika ity toe-javatra hafahafa ity.

L.N