Mandrava ny haintrano eto an-drenivohitra sy ny manodidina. Nitrangana firehetana indray teny amin’ny  67 Ha, omaly maraina, tokony tamin’ny 7ora. Afo avy amin’ny « gaz » no nahatonga ny loza nandritra ny fikarakarana sakafo vao maraina. Tany ambony rihana no niainga ny afo ka kila tanteraka izany efitra izany ary tsy nisy avotra ny entana rehetra teo anoloan’izany. Ramatoa be iray 67 taona marary teo am-pandriana ihany koa no namoy ny ainy tsy voavonjy nandritra ny haintrano.

Nisahotaka ny manodidina nahita ny fijoalajoalan’ny afo nivoaka tamin’ity trano ity ka nampandre ny mpamonjy voina avy hatrany izy ireo. Tonga ara-potoana ihany ireo mpamono afo saingy noho ny fahateren’ny lalana miditra any amin’ny toerana nisy ny fahamaizana dia sahirana izy ireo nanao ny asany. Voatery nampiasa fantson-drano lava izy ireo ka vetivety ihany dia voafehy ny afo ka tsy niitatra tamin’ny trano mifanila amin’ity nirehitra ity. Efa mandeha ny fanadihadiana nahatonga ny fahamaizina.

Laurena Nany