Mitohy hatrany ny fandripahana ataon’ilay afo hafahafa tsy fanta-pihaviana any amin’ny kaominina ambanivohitr’i Sambava. Ankoatra ireo trano miisa 5 kilan’ny afo tao Antetezandravina Ambaritelo dia nihazo an’i Ambalafary indray izy io. Araka ny tatitra voaray avy any an-toerana dia trano enina indray no kila forehitra any amin’io toerana voalaza io, omaly maraina, tamin’ny 10 ora. Manoloana ity tranga hafahafa ity dia mandry tsy lavo loha ireo mponina amin’izao fotoana izao sady mihorohoro ihany koa. Mbola mitohy ihany koa ny fangatahan’izy ireo amin’ireo tompon’andraikitra ny mba hijerana azy ireo satria maro ireo tsy manan-kialofana vokatr’ity fahamaizana ity. Zaza madinika, tanora, antitra matory eny an-tokontany efa hatramin’ny alatsinainy lasa iny.  Efa nisy kosa ny mpitandro filaminana nidina  ifotony nijery akaiky ny raharaha nefa mbola mistery ihany koa ity tranga ity amin’izy ireo amin’izao fotoana izao. Andrasana araka izany ny mety ho voka-pikarohana.

L.N