Mahazo vahana tanteraka ny halatra omby any amin’ny distrikan’Antsohihy amin’izao fotoana izao. Dahalo miisa 4 misaron-tava, mirongo basim-borona iray no tonga nandroba tao Anjiabe, fokontany Antanimena, kaominina Ambodimandresy, ny 3 desambra lasa teo, tamin’ny 10 ora alina. Nirefodrefotra ny poa-basy tamin’ny fandalovan’ireo malaso ary vao nipoaka indray mandeha izany dia samy namitsaka tsy nisy sahy nivoaka ny tranony ny iray tanàna. Nandritra izany no nanararaotin’ireo olon-dratsy nandroba omby miisa 14 tao amin’ny vala sy vola vidin’omby miisa 2 vao avy namidy ary « radio carte » iray tamina tokantrano iray.

Ahiana ho olona mahafantatra ireo lasibatra ihany ireo mpangalatra ireo satria nahalala tsara fa avy nivarotra omby. « Aiza ny vola vidin’omby ? Omeo aty daholo ny vola fa raha tsy izany dia ho vonoinay ianareo », hoy ireo olon-dratsy tamin’ireo voatafika. Nandeha nianatsimo ny dian’izy ireo rehefa azony izany. Tsy nisy kosa ny aina nafoy na naratra.

L.N