Nitrangana lozam-pifamoivoizana mahatsiravina indray tamin’iny lalam-pirenena voalohany iny ny alin’ny talata tokony tamin’ny 8 ora alina. Fiara mazda nitondra mpianatra avy nanao fianaran’asa tany Tsiroanimandidy miisa 7 ka hiakatra aty Antananarivo no nifandona tamin’ny fiara lehibe iray teo Ambatomirahavavy. Nifanatrika ireo fiara roa ireo ary nangalatra lalana ilay kamiao lehibe, araka ny loharanom-baovao avy any an-toerana, ka nifatratra avy hatrany tamin’ilay Mazda. Noho ny fifandonana mafy loatra, samy nipitika izy roa  ka teny amoron-drano no niafaran’ilay kamiao.

Vokany, olona roa no namoy ny ainy izay nipetraka teo aloha ka anisan’izany ny mpamily. Tonga teny an-toerana fotoana fohy taorian’ny nitrangan’ny loza ny mpitandro ny filaminana izay nifanome tanana tamin’ireo mponina manodidina nanala ireo namoy ny ainy. Ireo naratra kosa nentina nitsaboana teny amin’ny hopitaly Hjra. Potika tsy nisy noraisina kosa ilay fiara nitondra ireo mpianatra.

Laurena Nany