Nirefotra ny basy tao Ambatokapaiky, kaominina Amboditsaravina, distrikan’Ambositra, ny fiandohan’ny herinandro teo. Dimy lahy nirongo basim-borona vita gasy no niditra an-keriny tao an-tokantranon’ny ben’ny tanàna niaraka tamin’ny fianakaviany.

Nopitsohin’ireo jiolahy  ny varavaram-be ary nanao amboletra niditra ary nandrohana ireo lasibatra hamoaka ny vola. Noho ny tahotra sy ny hery tsy mitovy dia tsy sahy nikofoka ny iray trano, hany ka, nanao izay danin’ny kibony tanteraka ireo jiolahy nandrava ny entana rehetra.

Lasa ny lelavola mitentina valo hetsy ariary sy ny fitafiana maro isan-karazany ary ny entana tao an-trano. Isan’izany ny « tablette » izay vao nozaraina ho an’ireo Ben’ny tanàna. Tsy nisy ny aina nafoy na naratra fa lasa nandositra ireo jiolahy vao nahazo izay nilainy. Nampandre ny mpitandro filaminana avy hatrany ireo lasibatra taorian’izay ka minitra vitsy dia tonga teny an-toerana iry voalohany nanao ny fizahana. Nahitana taim-bala teo amin’ny manodidina. Mandeha ny fikarohana ireo olon-dratsy.

Laurena Nany