Mirongatra ny tsy fandriampahalemana any an-tampon-tanan’Ambatondrazaka, indrindra amin’izao andro avy orana izao. Tokantrano roa indray no lasibatra nandritra ny oram-be, ny fiandohan’ny herinandro teo. Ny iray voalohany tao amin’ny fokontanin’Ampasambazimba. Notohanan’ireo mpangalatra tamin’ny vato be avokoa ny varavaran’ny lasibatra vao niroso tamin’ny famikiana izy ireo. Efa fomba fiadin’ireo olon-dratsy ny tahaka izao, ary noho izay rotsak’orana izay dia tsy naheno na inona na inona ny tao an-trano, araka ny loharanom-baovao avy any an-toerana. Ary tsy vitan’izany fa nangonin’ireo jiolahy avokoa ny fitaovana maranitra rehetra tao an-trano, izay vao niroso tamin’ny fakana ny entana ry zareo. Tamin’izay indrindra no taitra ny raim-pianakaviana ka nokapain’izy ireo tamin’ny antsy avy hatrany, raha nikasa hanohitra azy ireo ka naratra mafy. Niara-dalana tamin’io ihany fa tany amin’ny zana-bohitra Tanambao kosa no niseho ny fanafihana faharoa. Tsy henon’ireo lasibatra ihany koa no nidiran’ireo olon-dratsy tao an-trano ka lasa avokoa ny fitaovana rehetra tao an-dakozia. Ny maraina vao taitra ny iray trano raha nahita ny lakozia babangoana tsy nisy na inona na inona intsony.

Laurena Nany