Tontosa ny zoma 11 desambra lasa teo ny fanolorana tamin’ny fomba ofisialy ny vahoakan’Analanjirofo ny lehiben’ny Faritra vaovao, Ramaroson Jacques, izay notronon’ny minisitry ny Indostria Rafidimanana Narson. Nakotrokotroka ny fitsenana ny lehiben’ny Faritra, izay niainga avy tao Namahoaka hatrany Fenoarivo Atsinanana manoloana ny lapan’ny Faritra Analanjirofo. Nandritra ny kabary nifandimbiasan’ireo manam-pahefana no nilazan’ny ben’ny tanàn’i Fenoarivo Atsinanana vaovao Franck Rico Mananjara, ny fahavononany hifanome tanana amin’ny lehiben’ny Faritra vaovao. Samy tanora hoy izy ka mitovy ny tadin-dokanga amin’ny fampandrosoana ny faritra misy azy ireo. I Ramaroson Jacques, izay mpandrindra rezionaly ny Ong Asos, mpandraharaha ara-toekarena, mpitarika tanora ary mpanao asa soa sy asa sosialy any an-toerana. Tsy vahiny eo amin’ny sehatry ny fampandrosoana, noho izany, ny lehilahy  satria andraikitra maro no efa nosahaniny eo anivon’ny fiaraha-monina toy ny fametrahana foto-drafitr’asa eny amin’ny sekoly sy ny hopitaly.