Tsy vao ny gazety no mitantara ny loza ataon’ireny kodiaran-droa ireny ary saika isaky ny herinandro dia miteraka faty olona foana. Vao haingana no namoaka didy ny mpitandro filaminana fa tsy azo atao intsony ny mitondra zaza amin’ny môtô sy ny manao taingin-telo kanefa dia andro vitsivitsy foana aty aoriana dia iny fa miverina ny lalan-dririnina. Dia toy izany ihany koa ny tsy maintsy hanaovana aro-loha, na ho an’ny mpitondra na ihany koa ho an’ny entina. Hentitra dia hentitra ny polisy sy ny zandary tamin’ny voalohany saingy tato afara dia nojerem-potsiny izany fandikana lalàna izany.Ny nahagaga ny maro aza dia ireo mpitandro filaminana ihany no tena mampianatra ny hafa tsy hanara-dalàna.

Omaly hariva tamin’ny 7ora sy sasany izao tetsy Ambohimanambola dia nisy scooter nanao “accident” ary dia nijininika tokoa ny ra. Tsy nisy nanao “casque” izy roalahy nitaingina môtô ireto ka be no nilaza fa sarotrarotra ny fandidiana ny amin’ny ho avin’izy ireo. Ary raha toa ka tsy maintsy atao ny fitsaboana dia heverina fa hasirasira be ihany ny faktiora ho aloan’ny fianakavian’izy ireo. Aoka hitandrina ary ny rehetra satria fotoana fanaovana “inventaire” ihany koa izao any ambony any.

J.L.R