Olona maro no nihodinkodina manoloana ny tranombarotra « Golden center » omaly maraina, nikasa handroba izy ireo. Tsy kely làlana tokoa ny mpanao ratsy ary tonga amin’ilay fitenenana hoe: ny fahorian’ny sasany fifalian’ny hafa. Manoloana ny fahamaizina nahazo ity tranombarotra ity, ny alatsinainy tolakandro teo, dia mbola misy ihany ireo olona manana fikasan-dratsy.

Noho izany dia voatery nanidy trano avokoa ireo fivarotana rehetra manakaiky ny Golden center. Mba hisorohana ny tranga tahaka ny tamin’ny 2009 iny, niantso ny Emmoreg avy hatrany ireo sinoa manana tranombarotra eny Behoririka hanara-maso sy hiambina iny toerana iny sy ny manodidina azy. Voatery nakatona ihany koa iny làlana mihazo ny Golden center iny, ny marainan’ny talata hatrany.

Raha tsiahivina, may kilan’ny afo ny tranombarotra « Golden center », ny alatsinainy nanomboka tamin’ny 3 ora tolakandro ary tsy maty mihitsy ny afo raha tsy efa tamin’ny 2 ora maraina tany ho any. Fipoahan’ny herinaratra nandritra ny fanaovana « soudure » tao amin’ny « sous-sol » no nahatonga ny fahamaizina. Potika ny tranombarotra ary saika may avokoa ireo entana rehetra tao anatiny. Tombanana any amin’ny miliara ny teti-bidin’ny zavatra may.

L.N