Nitrangana lozam-pifamoivoizana tany amin’ny lalam-pirenena Rn5, izay mampitohy an’i Fenoarivo Atsinanana sy Soanierana Ivongo, ny talata, tamin’ny 4 ora hariva. Fiara fitaterana iray avy any Soanierana Ivongo hihazo an’i Toamasina no niharan-doza rehefa tonga tany amin’ny fokontany Vohibato Tanambao Tampolo, kaominina Ampasina-Maningory, ao amin’ny distrikan’i Fenoarivo Atsinanana. Fandehanana mafy no nahatonga ny loza. Tsy nahatana ny familiana intsony ilay mpamily ka nitarika ny fivadihan’ny fiara. Vokany, olona miisa 19 naratra mafy. Vaky loha sy tapa-tongotra ary tanana ny ankamaroan’ireo mpandeha.

Ny enina tamin’ireo naratra, izay tena voa mafy, voatery nalefa haingana namonjy ny hopitaly Be any Toamasina raha manaraka fitsaboana any amin’ny hopitaly Fenoarivo Atsinanana kosa ny ambiny. Manoloana ny voina nahazo ireo mpandeha dia nandray ny andraikiny ny lehiben’ny Faritra Analanjirofo amin’ny fiantohana ny saram-pitsaboana rehetra mahakasika ireo niharan-doza.

L.N