Nandravarava teto an-drenivohitra sy ny manodidina ny jiolahy ny alin’ny talata hifoha alarobia lasa teo. Teny Andoharanofotsy sy Ankadifotsy no nahitana izany ka ireo mpivarotra enta-madinika sy mpivaro-toaka no tena lasibatra tamin’izany. Tsy fantatra na iray tarika ihany izy ireo fa mitovy ny fomba nanatanterahany ny asa ratsiny saria tao anaty oram-be sy haizina. Toa fantatr’ireo jiolahy fa variana misava fiara ao ampovoan-tanàna ny mpitandro filaminana ka nohararaotin’izy ireo hanafihana ny any anelakelan-trano rehetra any. Hita ihany koa fa toa matahotra orana ireo polisy satria tsy tazana eny ho eny mihitsy izy ireo raha vao mirotsaka ny oram-be. Amin’io fotoana io anefa no tena ilàna azy ireny any anelakelan-trano rehetra any satria tena tonga amin’ny fara-tampony ny tsy fandriampahalemana. Mandry andriran’antsy ny vahoaka indrindra ireo mpivarotra amin’izao ankatoky ny asaramanitra izao ka maro ireo manao antso avo mba ametrahana tetikady maty paika iadiana amin’ny tsy fandriampahalemana sy hiarovana ny isan-tanàna.