Be fako ny mponina sy ny mpandalo eto an-drenivohitra nefa vola be tsy toko tsy forohana no tsy maintsy laniana hanesorana izany. Tsy araky ny Samva sy ny tompon’andraikitry ny kaominina ny fanesorana ireo fako ireo ka tsy maintsy namoaka vola 400 tapitrisa Ariary ny minisiteran’ny Vola sy ny tetibola hanampiana ny Samva. Hanomboka anio ny fanesorana ireo fako amina taonina marobe ka ny toerana be olona toy ny tsena sy ny eny amin’ny faritra iva no hanombohana izany. Haharitra 15 andro eo ho eo ity hetsika fanesorana fako ity izany hoe hatramin’ny faran’ny  taona. Tsy vao sambany izao fa saika isaky ny fanombohan’ny vanim-potoanan’ny orana dia misavovona hatrany  ny fako eto an-drenivohitra ary tsy maintsy hamoahana vola be vao mba madiodio kely. Hita porofo fa tsy nivonona tamin’ny fiatrehana ny fanalana ny fako mihitsy ny mpitantana ny kaominina nefa izy ireo no tompon’andraikitra voalohany amin’ny fahadiovan’ny tanàna. Variana mandray vahiny sy manao fandaminana anatiny ny ben’ny tanàna ka tsy mahatsinjo intsony fa miaina ao anaty fako sy loto ary ny fitohanan’ny fifamoivoizana ny vahoaka.