Tsy misy maha-samihafa azy afaka mianatra sy mahay, manala fanadinana toy ny zaza rehetra ireo ankizy moana marenina. Noporofoin’ny ao amin’ny Semamo na Sekolin’ny marenina sy ny moana ao Morondava izany nandritra ny hetsika nokarakarain’izy ireo ny faran’ny herinandro lasa teo. Nanao fety ireo zaza tezaina ao sy ny ny mpanabe ka tamin’izany no nanehoany ny fahaizany sy ny talentany. Nohazavain’ny tompon’andraikitry ny sekoly fa misy karazany telo ny fampianarana arahin’ireo ankizy manana olana eo amin’ny fandrenesana. Voalohany amin’izany ny firesahana amin’ny alalan’ny tanana sy ny baiko, ary ny fihetsika samihafa ahafahana mifandray eo anivon’ny fiaraha-monina. Aorian’izay dia afaka manaraka ny programam-pampianarana nofaritan’ny minisiteran’ny Fanabeazam-pirenena ireo ankizy ka afaka miatrika sy manala ny fanadinana ara-panjakana. Efa marobe ireo moana marenina no afaka Cepe, Bepc ary bakalorea. Ary fahatelo, misy ny fampianarana arak’asa satria tena manan-talenta kokoa ny olona sahirana amin’ny fandrenesana. Tsy vesatra ho an’ny fiaraha-monina izy ireo ary tsy manana olana ara-batana sy ara-tsaina ka afaka mihoatra lavitra noho ny hafa.

Dom