Tsy tahotra tsy henatra ny eo amin’ny sampan-draharahan’ny seraseran’ny fiadidiana ny Repoblika niantso tody tamin’ny fomba ofisialy ary nampiasa teny tao anaty Baiboly mihitsy  “Loza ho an’izay nihavian’ny fanafintohinana” ho an’izay gazety sy olon-tsotra nohereviny fa nanely tsaho mikasika ilay mpanolotsainan’ny filoha voalaza fa tratra nitondra vola vahiny marobe teny amin’ny sisin-tany frantsay. Tian-dry zareo eo anivon’ny fitondrana mihitsy ny mampiasa ity voam-bolana “tsaho” ity nefa ry zareo ihany no toa manao izay hampiparitaka izany. Mitavozavoza ary tsy misy mangarahara ny fahazoam-baovao eo anivon’ny fiadidiana ny Repoblika raha oharina ny amin’ny primatiora sy ny minisitera sasany. Zara raha misy ny vaovao mikasika ny hetsiky ny filoha sy ireo fitsidiham-paritra ataony. Tsy azo hadinoina ihany koa ary mipetraka ho tantara fa mpanely tsaho sy vaovao tsy marina ny pejy facebook an’Ambohitsorohitra. Niaraha-nahita izany tamin’ilay fanapahan-kevitra mikasika ny fiantsoana ny delegasiona malagasy nandray anjara tamin’ny lalaon’ny nosy farany teo. Anisan’ny vaovao diso 100%  ihany koa no navoakan’io pejin’Ambohitsorohitra io tamin’ny fandraisan’ny Filoha anjara tany Sydney mikasika ny fivoriamben’ny valan-javaboahary maneran-tany. Santionany kely ireo fa marobe tsy tambo isaina ny vaovao diso miendrika tsaho avoakan-dry zareo ka mahatonga ny olona tsy hino azy intsony.

Dom