Nidaraboka tamin’ny tany ary saika tsy tafatsangana ny lehilahy roa nitaingina skotera izay nodomin’ny fiara tsy mataho-dalana teny Antsakaviro omaly maraina. Teo amin’ny vatan’ilay kodiaran-droa mihitsy no voadona ka tsy afa-niala ireo nitaingina azy. Diso rahateo ireto farany, raha ny voalazan’ireo nanatri-maso satria tsy nijery fa tonga dia nisongona sy nirimorimo toy ny fanaon’ny mpitondra môtô maro.

Nijanona ny taksi-be iray nanome lalana ilay fiara 4×4 hiampita. Tsy nisaina akory ilay mpitondra skotera fa mbola nisongona nefa ilay 4×4 efa nandroso saingy tsy tazany. Zavatra nipoaka be fotsiny no henon’ny manodidina ary skotera iray nipasaka tao ambany 4×4 sy lehilahy roa nihosom-potaka teo afovoan’ny arabe. Tafatsangana saingy niolakolana sy nitaraina ho voa tao amin’ny tongony izy roalahy.

Ilay saoferan’ilay fiara kosa tsy niraharaha ny zava-nisy fa nijanona teo amin’ny familiana ihany niandry ilay môtô hesorina izay nibahana ny lalany. Samy tsy nisy nanasaro-javatra rahateo ny roa tonta ka vitavita ho azy teo ilay lozam-pifamoivoizana. Mila mitandrina ihany ireo mpandeha skotera

satria ny aina tsy ananam-piry ary ny tonga soa ihany no arahabaina.

Dom