Nahita fidiram-bola vaovao ny ankizy madinika eny Andravoahangy sy Ambodivona ary ny manodidina hatramin’ny niakaran’ny rano vokatry ny rotsak’orana. Mibaby mpandalo izy ireo ka Ar 200 isan’olona ny karama takiany ho an’izay te hiampita nefa tsy sahy miroboka ao anaty ranom-potaka. Rehefa tsy zakan’ny ankizy iray ny olon-dehibe dia roalahy izy ireo no miara-milanja ka zaraina mitovy ny vola azo. Tsy misy vahaolana ankoatra ny filanjana sy ny sarety rahateo hatreto ny fifamoivoizana eny amin’ny faritra iva rehefa mijohy ny orana ka miakatra ny rano. Ankoatra ny tahotra tsy te hirobo-drano dia risika goavana, ihany koa, ny fisian’ny lavaka be sy ny tatatra tsy misarona takon’ny ranom-potaka. Hatramin’ny omaly, tsy mbola nisy solontenam-panjakana ambony nidina nijery ifotony ny fiakaran’ny rano izay manelingelina ny fifamoivoizana eto an-drenivohitra. Ireo polisy misahana ny fandrindrana ny fivezivezen’ny fiara sisa no tazana manao izay ho afany mba ampihenana ny fitohanana manerana ny tanàna.

Dom