Efa manomboka manao fihetsika fanehoana ny tsy fankasitrahany ny fako miparitaka manerana ny tanàna ny vahoakan’Antananarivo. Omaly dia naparitaky ny mponina teny Mahavoky teny afovoan’ny arabe ny fako rehetra ka tapaka hatramin’ny lalana.  Tofoka tanteraka amin’ny fihetsiky ny kaominina sy ny Samva ary ny fitondram-panjakana ny mponin’Iarivo ary efa maro ireo mitaky ny hisian’ny hetsi-bahoaka hanehoana izany fahasosorana izany. Lasan-ko vavany fotsiny ireo manam-pahefana misora-tena ho tompon’andraikitra sy mitavana ny volam-bahoaka fa tsy mahavita na inona na inona akory. Mbola hitombo be ireo fako ireo amin’izao ankatoky ny fetin’ny faran’ny taona sy ny taom-baovao izao ary ahiana ny hiparitahan’ny areti-mifindra eto an-drenivohitra. Mifanilika andraikitra sy miady fahefana fotsiny ny ben’ny tanàna sy ny Samva fa samy tsy aninona tsy aninona ary  tena tsy misy ilana azy mihitsy raha izao fako eto Antananarivo renivohitra izao. « Rehefa tsy hanao dia mialà  mba tsy ho esorin’ny vahoaka », hoy ny antsoantson’ny olona teny Mahavoky omaly.

Dom