Tovolahy iray 23 taona any ho any no maty voatifitry ny dahalo, teny Ambohimanga, ny alin’ny taom-baovao lasa teo. Nanatanteraka fanafihana mitam-piadiana tao an-toerana ny olon-dratsy miisa 6 io alina io. Vao nanapoaka basy anefa ireto farany dia nitsirika avy eo am-baravarankely ilay tovolahy ary tazan-dry zalahy izany ka norarafan’izy ireo tifitra avy hatrany. Voa teo amin’ny tendany ka maty tsy tra-drano.  Lasan’ireo dahalo avy eo ny omby miisa 3 an’ny dadatoany izay mipetraka mifanakaiky eo ihany. Fantatra fa tsy tao an-toerana io dadatoany io tamin’ny fotoana nandalovan’ireo mpangalatra fa ny nenitoany irery no tao. Araka ny vaovao voaray dia miaramila ny sasany tamin’izy enin-dahy nanao ny fanafihana sady olona avy any amin’ny faritra Atsimon’ny Nosy iny. Nandrahona ireo voatafika ihany koa ireo dahalo alohan’ny nialany ny tanàna nilaza hoe « tsy maintsy matinay ianareo mianakavy ». Efa hatramin’ny 4 sy 11 desambra no nanafika sy nivezivezy teny an-toerana ireo olon-dratsy, raha ny fanambaran’ny loharanom-baovao hatrany. Efa misokatra ny fanadihadiana.

Laurena Nany