Loza mahatsiravina no nitranga tany Fetra-Omby, distrikan’i Brickaville, ny alahady lasa teo. Vehivavy iray no hitan’ny olona naratra mafy manakaiky ny lalam-by tany an-toerana, tokony tamin’ny 9 ora maraina. Araka ny fanambaran’ny loharanom-baovao dia azo vinavinaina avy hatrany fa mety ho voahitsaky ny lamasinana izy io. Tsy nisy nahita ny loza nahazo azy, tsy fantatra ihany koa ny antony nahatonga izany. Fanontaniana mipetraka anefa ny hoe, « tsy henon’ilay ramatoa ve ny feon’ny lamasinana manaraka avy ao an-damosina sa nanao fanahy iniana izy ? » Ahiana ho namonon-tena mantsy izy io.

Nentina haingana tany amin’ny hopitaly any Brickaville izy avy eo mba hahazo fitsaboana haingana. Na teo aza anefa ny ezaka nataon’ireo mpitsabo dia tsy tana intsony ny ainy omaly maraina vao mangiran-dratsy. Efa natolotra ny fianakaviana ny razana. Misokatra kosa etsy andanin’izay ny fanadihadiana mikasika izao trangan-javatra izao. Ny polisin’ny orinasa Madarail no miandraikitra izany, raha ny fanazavana azo.

Laurena Nany