Nitrangana haintrano tany Anosibe An’ala, kaominina Antandrokomby, ny alakamisy 31 desambra lasa teo, tamin’ny 12 ora atoandro. Tokantrano miisa 124 no indray ripaky ny afo tamin’izany fotoana izany, tao amin’ny fokontany Mangoro. Tsy fantatra ny nahatonga ny fahamaizana fa niainga avy amin’ny trano iray ny afo ary niparitaka tamin’ireo 123 ambiny avy eo.

Nifanome tanana tamin’ny famonoana ny afo ireo mponina tany an-toerana raha vantany vao nanomboka ny firehetana saingy noho ny tsy fahampian’ny rano sy ny fitsokan’ny rivotra dia nanano sarotra azy ireo izany. Naharitra ora maro vao voafehin’izy ireo tanteraka ny afo. Vokany, lasa lavenona tsy nisy niangana tao anatin’ny fotoana vitsy avokoa ireo trano ary tsy nisy noraisina ireo entana ka anisan’izany ny vokatra toy ny vary tao anaty sompitra.

Tsy nisy kosa ny aina nafoy fa olona iray no naratra mafy, enina hafa naratra voan’ny fantsika. Mahatratra 700 kosa ireo fianakaviana tsy manan-kialofana vokatry izao haintrano izao. Tombanana an-tapitrisa ny teti-bidin’ny zavatra may.

Laurena Nany