Mpivady mpizahatany teratany Soïsa no norobain’ny jiolahy, teo amin’ny lalana miakatra ny Allamanda, any Antsiranana, ny alahady lasa teo. Niaraka tamin’ilay sambo lehibe Neo Costa Romantica izy roa ireto ary tamin’ny fivoahan’izy ireo ilay sambo no nisy nanendaka izy mivady ka lasa ny vola mitentina 2000 farantsa soïsa. Karazany efa niandry olona ho robaina  avy tamin’ity sambo ity ireo mpanao ratsy, araka ny vaovao voaray avy any an-toerana. Nitondra fiara izy ireo ary tsy nisy nahatsikaritra ny laharan’izany nefa tsy manalavitra ny vavahadin’ny seranam-tsambo no misy ny zandary. Efa tamin’ny fitoriana nataon’ny tompon’andraikitra ny sambo no nahafantarana ny trangan-javatra. Raha ity zavatra niseho ity dia tsikaritra fa tena marefo ny fitandroana ny filaminana eto amintsika. Ary ny fihetsika tahaka izao dia manimba endrika ny fizahantany eto amin’ny Nosy.