Nanamarika ny fiandohan’ny taona 2016 ity teo amin’ny ara-pinoana ny fifandonana nataon’ireo mpino tao amin’ny fiangonana zandriny iray, tany Ambatondrazaka. Fanakianana nataon’ny mpitondra fivavahana tamin’ireo mpino no niandohan’ny olana, ny andron’ny alahady lasa teo, nandritra ny fanompoam-pivavahana. Nikarakara lanonana an-tsehatra ireo mpivavaka ny andron’ny taom-baovao, izay nahatonga fahasorenana teo amin’ilay pasitera, noho ny fihetsika tsy mendrika nataon’izy ireo izay manaraka amin’ny fiainan’izao tontolo izao. Tsy nitovy fomba fihevitra taminy anefa ireo olona notarihany ka nahatonga ny ady. Samy nampiaka-peo izy rehetra ary nivoaka avokoa ny lonilony hatramin’izay ho an’ireo olona izay efa tsy nahazohazo ity pasitera ity sy ny mpomba azy, izay tonga hatrany amin’ny fikasihan-tanana ka niafara tamin’ny ady saritaka. Ny fanelanelanan’ny mpitondra filaminana no nampitony ny iray fiangonana, araka ny loharanom-baovao. Olona am-polony, noho izany, no naratra vokatry ny fifandonana. Vehivavy iray bevohoka no voalaza fa safotra tsy nahatsiaro tena mihitsy.

Laurena Nany