Talen’ny departemanta iray mitana andraikitra eny amin’ny lapan’ny kolontsaina sy ny fanatanjahantena, izay monina eny Maroroho, no notafihan’ny andian-jiolahy maromaro, ny alin’ny talata hifoha alarobia lasa teo. Lasan’ireo olon-dratsy ny lelavola mitentina 400 000 ariary, ny vangovango volamena ary ny entana sarobidy samihafa tao an-trano. Tsy vitan’izany fa nokapohan’izy ireo ny zava-maranitra ilay tompon’andraikitra ka vaky loha. Vokany, somary atahorana ny ainy, araka ny filazan’ny mpitsabo nandray azy.

Nampametra-panontaniana ny mpitazana ny raharaha satria lavitra ihany ny fomba nahatafidiran’ireo jiolahy tao an-trano anefa ilay mpiambina tsy naninona mihitsy, raha ny voalazan’ny fampitam-baovao.

Tsy fantatra ihany koa na fifandrifian-javatra fa minitra vitsy taorian’ny fitsidihana nataon’ny tompon’andraikitra ambony hafa tao amin’ny trano fonenany no niseho ny fanafihana. Tsy tao an-toerana kosa ny vady aman-janany fa mbola tany am-panaovana fialan-tsasatra. Arahi-maso akaiky ny toe-pahasalamany amin’izao fotoana izao. Efa misokatra ny fanadihadiana.