Makamba lena 40 kilao no saron’ny zandary tao ambonin’ny taksiborosy, teo amin’ny sampanana hivoaka ny tananan’i Morondava, omaly maraina. Nanao fisafoana teny amin’ny fiantsonan’ny taksiborosy tany an-toerana ny mpiasan’ny ministeran’ny Jono, ny marainan’io. Efa nifono labasy sady vonona ny handeha ity taksiborosy ity ka navelan’ireo mpisava hanainga ihany. Rehefa lasa kosa ilay fiara dia nampandre ireo zandary mpanao barazy ireo mpanao fisavana mba hanao ny fisavana.

Sarona, noho izany, ny makamba lena 5 kesika sy 2 sobika, izay milanja 40 kilao. Rehefa nanontaniana izay tompon’ireo haza an-dranomasina  ireo dia samy tsy nisy nilaza ho tompony avokoa ireo mpandeha. Nilaza kosa ilay mpamily fa entana nampiarahana taminy ireo ka nangatahana indray ve ny taratasin’ireo haza an-drano ireo fa nilaza tsy manana izany izy fa hoe alefa any Antsirabe ireo entana ireo. Fantatra noho izany fa tsikombakomba an’ilay mpamily sy tompon’ entana no nahatonga ireo makamba ireo tao amin’ilay fiara ary ahiana tamin’ny alina izy ireo no nampiditra an-tsokosoko izany. Notazomina avy hatrany ilay mpamily ary nogiazana manaraka izany ihany koa ireo entana. Misokatra ny fanadihadiana.

L.N