Nirefodrefotra ny basy tany amin’ny distrikan’i Manandrina, omaly, tamin’ny 11 ora atoandro. Dahalo miisa 60 nilanja fitaovam-piadiana mahery vaika no nanafika tanana roa : tao Ambohimilanja sy Soatanana. Nisy ireo vaky nandositra vao nahita ny fiavian’ireo olon-dratsy izay nanao tifitra variraraka raha niditra ny tanàna fa nisy kosa ireo izay tsy nanaiky lembenana fa niezaka nanohitra azy ireo. Fa tsy mitovy  ny  hery dia niala maina ireo fokonolona ary nisy mihitsy ireo namoy ny ainy fa mbola tsy fantatra ny isany.

Lasan’ireo dahalo avokoa ny omby rehetra tao amin’ireo tanàna roa ireo sy ny fananan’ireo fokonolona, izay azony nangalarina, araka ny loharanom-baovao. Tsy niraviravy tanana kosa ireo zandary tany an-toerana fa avy hatrany dia nanenjika ireo olon-dratsy tamin’ny kodiaran-droa rehefa nampandrenesina.

Fantatra fa mahazo vahana amin’izao fotoana izao ny tsy fandriampahalemana any amin’ny distrikan’i Manandrina. Tsy misy andro iray izay tsy nahenoana fanafihana mitam-piadiana ataon’ireo dahalo, izay mandroba ny fananan’ireo mponina ary tsy vitan’izany ihany fa mbola mamono koa izy ireo.

Laurena Nany