Nitrangana loza vokatry ny filatsahan’ny varatra tao an-tampon-tanànan’Ambositra, ny talata tolakandro teo, tokony ho tamin’ny telo ora sy sasany no nitrangan’izany. Nirefodrefotra ny varatra ary nilatsaka tamin’ny trano iray tao amin’ny fokontany Ambohimanjaka. Vokany, olona telo mianaka no indray maty. Avy niava vary izy ireo ary nahandro sakafo avy hatrany nony tonga tao an-trano ka nandritra  izay fotoana izay no nirefotra ny varatra. Maty tsy tra-drano avy hatrany ny olona roa raha toa ka naratra ny ankizivavy kely. Nentina haingana nihazo ny tobim-pahasalamana ity farany mba hahazo fitsaboana saingy tsy tana intsony ny ainy.

Tamin’io fotoana io ihany saingy tao amin’ny fokontany iray hafa, mbola tao Ambositra ihany, zaza roa samy nilalao teo an-tokontany no indray nipoahan’ny varatra. Naratra mafy izy roa ary efa nahazo fitsaboana teny amin’ny tobim-pahasalamana any an-toerana. Voalaza fa tsy misy atahorana ny ain’izy roa amin’izao fotoana izao.
Tsy dia mpitranga ao an-tampon-tanànan’Ambositra ny filatsaham-potaka nahafatesan’olona toy izao. Mpitranga any amin’ireo fokontany sy faritra manodidina kosa anefa izany.

L.N