Mahazo vahana ny tsy fandriampahalemana eny amin’ny boriborintany fahatelo iny. Ho an’ny taona 2015 dia mpanao sinto-mahery sy mpangaro-paosy miisa 97 no nidoboka eny Antanimora, hoy i Razafindrazaka Hector, kaomiseran’ny polisy eny amin’iny boriborintany fahatelo, nandritra ny valan-dresaka nataony tamin’ny mpanao gazety omaly, teny Antaninandro. Voafehy amin’ny ankapobeny nefa tsy tena voafehy tanteraka ny tsy fandriam-pahalemana eny an-toerana. Ny tena olana, araka ny filazany hatrany dia ny tsy fahampian’ny mpitandro filaminana nefa betsaka ny faritra fehezina.

Fokontany miisa 43 no sahanin’izy ireo, izay manomboka eny Ambatomaro ka hatrany Antanimena. « Mangataka fiaraha-miasa amin’ny vahoaka, noho izany, izahay fa tsy mora ny andraikitra sahanina. Raha vao mahita trangan-javatra mampiahiahy dia aoka hampilaza avy hatrany ny polisy akaiky azy », hoy i kaomisera Razafindrazaka Hector.

L.N