Renim-pianakaviana iray no naratra mafy rehefa nanatsipazan’ny zanany angady. Ny andron’ny zoma 15 janoary lasa teo, no nisehoan’izany tany ambanivohitr’Ambohitsara, distrikan’Antalaha. Namboly teny an-tanimbary izy mianaka no niseho ny loza. Rehefa ela niasa tany teo mantsy ny zanany lahy izay tokony 15 taona any ho any dia nilaza fa reraka ka niato kely naka aina. Ny reniny kosa izay mbola nanohy hatrany ary naniraka ilay tovolahy mba nanome azy ny angady. Tsy fantatra anefa ny nahazo ilay zazalahy fa avy hatrany dia natsipiny ilay angady fa tsy mba nomeny moramora ny reniny. Voa teo amin’ny lohan’ity farany ka nijininika ny ra eran’ny saha ary nifamonjena nentina tany amin’ny toeram-pitsaboana tao Antalaha izy. Tsy atahorana kosa ny ainy, araka ny vaovao voaray.