Isan’ireo firenena nandray anjara tamin’ny COP 21 i Madagasikara amin’ny fikajiana ny tontolo iainana. Miara-misalahy ny rehetra mba hampihenana ny tahan’ny hafanana ho 2%. Mandray anjara amin’ny fikajiana ny tontolo iainana ny orinasa maro be ka tsy very anjara amin’izany ny Cnaps. Ny herinandro lasa teo ary dia niara-nirohotra tany Ambohidray Miarinarivo ny fianakaviam-ben’ny Tahirim-pirenena notarihin’ny Tale Jeneraly Raoul Arizaka Rabekoto sy ireo mpiara-miasa avy amin’ny tendro sy ny masoivoho manerana ny Nosy. Zana-kazo sapin 4 000 no novolena tao Ambohidray toerana mamatsy rano fisotro madio ny vahoakan’ i Miarinarivo.

Jery lavitra fitsinjovana ny firenena no asa natao dia niara-nisalahy tamin’ny Cnaps ireo hery velona rehetra taty Itasy nahitana ny “Préfet de région” sy ireo mpiara-miasa aminy, ny lehiben’ny faritra sady filohan’ny ligin’Itasy, ny ben’ny tanànan’ i Miarinarivo, ny Dren sy ireo talem-paritra isan-tsokajiny avy amin’ny Fahasalamam-bahoaka, ny Asam-panjakana sy ny asa ary ny lalàna sosialy.

Fa ankoatry ny fambolen-kazo dia asa imasoan’ny Cnaps ny Fiahiana ara-tsosialy. Notoloran’ny Tahirim-pirenena fanampiana ireo olona sahirana ara-pivelomana avy amin’ny fokontany 05 ato anatin’ny Kaominina Miarinarivo. Miisa 300 ireo fianakaviana nozaraina vary, menaka, savony ary kojakoja ilaina amin’ny fiainana andavanandro.