Ramatoa lehibe roa, Mamasoa 66 taona sy  Sahondra 40 taona,  no voasambotry ny polisin’ny boriborintany faharoa, teo am-pivarotana rongony. Tamin’ny fanadihadiana ireo mpifoka rongony tratra manodidina an’Analakely no nahafahana nisambotra azy ireo ny zoma 15 janoary, tamin’ny 4 ora tolakandro, teny Tsaralalana manakaiky ny trano fandraisam-bahiny lehibe iray eny an-toerana. Efa matetika miverimberina  ny anaran’izy ireo ka izao tratra izao. Sarona niaraka tamin’izy ireto ny fonosan-drongony miisa 7. Nentina avy hatrany tao amin’ny biraon’ny polisy izy ireto atao famotorana ary nandritra izany no nilazan’ireo ramatoa lehibe ireo fa efa naharitra 10 taona mahery no nanaovan’izy ireo io asa ratsy io ary efa nigadra teny Antanimora, noho io, rongony io hatrany. Raha i Mamasoa dia in-dimy nigadra raha indray mandeha kosa i Sahondra. Mbola tamin’ny fanadihadiana azy no nilazan’izy ireo fa eny Ivo Antohamadinika no fangalany ireo rongony amidiny. Natolotra ny fampanoavana omaly ny raharaha.

Laurena Nany