Ankizivavy 11 taona monina ao Androranga no niharan’ny hetraketraky ny zandary iray miasa eo anivon’ny seranan-tsambon’i Toamasina. Zanaka polisy ity niharan’ny fanolanana ity raha toa ka mpanofa tranon’izy ireo kosa ilay zandary. Monina miaraka amin’ny reniny ilay ankizivavy ary amin’ny fotoana tsy maha eo ireo voalohany no nisehoan’ny herisetra. Efa ny volana novambra sy desambra 2015 no nitrangan’izany ary in-telo no niharan’izany ity ankizivavy.  Nantsoiny nankao an-tranony ilay zazavavy tamin’ny voalohany ary raha vantany vao tafiditra ao dia notampenana ny vavany ary vetavetainy amin’ izay. Rehefa vita ny filan-dratsiny dia rahanony. Torak’izay hatrany no niseho.

Araka  ny loharanom-baovao voaray, rahonany ho tifirina amin’ny basy ilay zaza raha tsy mankao an-tranony amin’ny fotoana ilany azy. Tsikaritry ny mpiara-monina anefa ny fihetsika hafahafa ataon’ity zandary ity ka nampandre ny ray aman-drenin’ilay zazavavy kely izy ireo ary rehefa nohadihadiana fatratra ity farany dia nilaza ny marina ihany. Tamin’izay ihany koa no nilazan’ny mpanampy azy ireo fa efa saika niharan’ny fanolanan’ilay zandary koa izy saingy mbola tafatsoaka. Noporofon’ny mpitsabo tao amin’ny hopitaly Be raha teo fa simba tanteraka ilay voaolana. Nametraka ny fitoriana, noho izany, ny rainy, ny 29 desambra 2015 lasa iny fa ny mahagaga anefa dia mbola miriaria ao Toamasina hatrany ilay nahavanon-doza.

Laurena Nany