Iray andro taorian’ny fitsarana an’i Kohen Rivo Lala dia miverina amin’ny heriny ny ambalavelona. Aretina ateraky ny fampijaliana ataon’ny fanahy ratsy. Mpianatra miisa 7 ao amin’ny Epp Besavoa, any Ihosy no nihetsehan’ ity aretina hafahafa ity, omaly maraina. Voatery nalefa nody avokoa ireo mpianatra. Tsy toy ny fihetsehana hatramin’izay no niseho fa vao maika niha-nahery satria maharitra minitra maro izany. « Mikiakiaka mafy ireo zaza toy ireny misy biby be mampitahotra ireny ny fahitana azy. Lasa mivalo mainty ary mirifatra ka mivadika matanjaka be indray avy eo », araka ny loharanom-baovao.

Tsy tany Ihosy ihany anefa fa zaza ampolony mahery, mpianatra masera no nihetsika ambalavelona, omaly hatrany. Voatery naato ny fampianarana ary nalefa nody daholo ihany koa ny mpianatra rehetra. Sekoly iray hafa tsy miankina ihany koa no nahitana fihetsehana tamin’io fotoana io fa tsy fantatra ny isan’ireo lasibatra tao. Tsy fantatra intsony ny tena marina. Velom-panontaniana ireo mponina. Miaina ao anaty tahotra sy tebiteby ireo ray aman-drenin’ny mpianatra manoloana ity asan’ny devoly ity satria tsy misy fanafana ny aretina. Tsy ahitam-bokany loatra ny fandroahana devoly ataon’ireo mpitondra fivavahana, araka ny loharanom-baovao hatrany.

Laurena Nany