Ny fahorian’ny sasany fifalian’ny hafa. Manoloana ny fiakaran’ny rano amin’ny tetezanan’i Mampikony, any amin’iny lalam-pirenena Rn4 dia  betsaka ireo fiara tavela na avy any Mahajanga sy Antsiranana hihazo ny renivohitra na ny avy aty Antananarivo ho any amin’ireo tanàna voalaza ireo. Mahatratra any amin’ny 4 kilometatra any ho any ny fahatapahana.

Tsy vitsy noho izany ireo manararaotra manao bizina kely atao fitadiavam-bola ka mampiasa ireny lakana ireny hiampitana. Rehefa tsy afaka hiampita ihany mantsy ireo fiara dia ireo olona no alefa. Efa nifandamina ireo koperativa mampitohy ireo lalana ireo fa ampifamadihana ny mpandeha amin’izay tsy matiantoka. Araka ny loharanom-baovao voaray avy any an-toerana, ireo mpandeha  avy any Antsiranana na Mahajanga mandray ny fiara nitatitra ireo avy aty Antananarivo rehefa tafampita ny rano  ary torak’izay ihany koa ireo avy aty an-drenivohitra hihazo ireo toerana roa ireo ka 15 000 ariary no mampita olona iray. Efa lasa fadin-tseranana kely mihitsy eny amin’ny tetezan’i Mampikony amin’izao fotoana izao. Ireo mpivarotra sakafo moa efa tsy lazaina intsony.