Tao anatin’ny herinandro monja dia olona telo no namoy ny ainy tany amin’ny kaominina Bezezika, distrikan’i Mahabo, vokatry ny tsy fandriampahalemana. Maty novonoin’ny dahalo ny roa tamin’izy ireo raha toa ka matin’ny fitsaram-bahoaka kosa ny fahatelo. Ity farany izay fantatra fa namono nahafaty ny mpampiasa azy. Tao amin’ny fokontany Bemahasoa no nisehoan’izany, ny zoma lasa teo. Tezitra ny manodidina ka nampihatra ny fitsaram-bahoaka.

Nisehoana fanafihana dahalo tao amin’ny fokontany Ankifiofio, ny sabotsy alina hifoha alahady teo. Nirefodrefotra ny basy izay nampivarahontsana ny mponina ka samy namitsaka tsy nisy sahy nanohitra ireo olon-dratsy. Nanararaotra namoaka ireo omby tao am-bala ireto farany ary tamin’izay fotoana izay indrindra no nivoaka ny tompon-biby ka notsenain’ireo dahalo tamin’ny tifitra variraraka.

Maty tsy tra-drano ilay raim-pianakaviana ary lasan’ireo dahalo ny omby miisa 12. Niantso ny mpitandro filaminana avy hatrany anefa ny fokonolona vao lasa kelikely ireo malaso saingy tsy nidina nijery ifotony ny raharaha izy ireo, araka ny loharanom-baovao. Niezaka nanao ny fanarahan-dia irery noho izany ireo vahoaka nefa tsy mbola nahitana vokany izany hatramin’izao.

L.N