Tsy mitsahatra mitady hevitra ahafahana manatanteraka ny asa ratsiny foana ireo jiolahy. Fantatra mantsy amin’izao fotoana izao fa mena-boay indray no entin’izy ireo mandeha mamaky trano, any Ambatondrazaka. Raha ny vaovao voaray dia atsipin’ireo olon-dratsy amin’ny alika ny mena-boay izay mahatonga azy ho laon-defona ka mandositra ary miditra moramora amin’izay ireo jiolahy. Fantatra ihany koa fa tsy mifidy ora hanafihana izy ireo fa manararaotra kosa ny tsy maha eo ny tompon-trano. Efa maro ireo fokontany lasibatra. Ny alahady lasa teo no nisy tranga farany, nandritra ny fitsaram-bahoaka niseho tao amin’ny fokontany  Atsimondrova. Lehilahy iray no tratran’ny fokonolona namaky trano tamin’io fotoana io ka nandritra ny vono sy daroka nahazo azy dia tokantranon’olona iray no nararaotin’ny olon-dratsy novakiana. Efa tafiditra soamantsara ny mpangalatra no tra-tehaky ny tompon-trano.

Araka ny angom-baovao voaray dia ahenoana vaky trano foana any an-tampon-tanànan’Ambatondrazaka isaky ny alina.

L.N