Nisehoana fanafihana mitam-piadiana indray, tany Betroka, ny faran’ny herinandro teo, tao amin’ny fokontany Analarora. Andian-jiolahy tsy fantatra isa nirongo basy mahery vaika no tonga masiaka tao an-tanàna nandroba omby tao am-bala. Tsy nisy sahy nivoaka ny mponina nandritra ny fandalovan’ireo dahalo tany amin’izany fokontany izany. Vokany, omby telopolo isa no lasibatra.

Fantatra ihany koa fa tsy nisy sahy nanao ny fanarahan-dia na ny mpitandro filaminana natao hiaro ny vahoaka sy ny fananany na ireo voaroba. Araka ny vaovao voaray dia raiki-tahotra izy ireo. Mahagaga ihany ity fihetsiky ny mpitandro filaminana ity. Raha tsy sahy mifanandrina amin’ireo olon-dratsy izany ireto farany dia iza no tokony hifandona amin’ireo jiolahy ireo? Anefa izy ireo no efa vita hofana natao hiatrika izany.

Manoloana izany toe-javatra izany dia velon-taraina ny mponina any an-toerana ary mangataka ny mba andefasana mpampandry tany any amin’iny faritra Betroka iny satria taorian’ny nahafatesan’ilay zandary tany an-toerana dia nahitana trangam-panafihana foana ireo tanàna manodidina an’iny faritra iny.

Laurena Nany