Nisehoana fanafihana mitam-piadiana tany Ambatofinandrahana, ny herinandro lasa teo. Tokantrano iray no lasibatry ny andian-dahalo tsy fantatra isa, nirongo kalachnikov. Nanapoaka basy in-telo izy ireo vao niditra ny tanàna ampitahorana ny manodidina. Nopotsihan’izy ireo avy eo ny varavarana ary vantany vao tafiditra tao dia nanabana basy ny tompon-trano mba hamoaka ny vola rehetra. Nilaza tsy manana ilay raim-pianakaviana ka tsy nisalasala ireo olon-dratsy nikapa antsy an-dramatoa vadiny mba ampitandremana azy. Saingy mbola nidrikina nilaza tsy manana ny zavatra tadiavin’ ireo jiolahy ilay rangahy ka norarafan’ireo dahalo tifitra variraraka ary maty tsy tra-drano fa ilay ramatoa kosa naratra mafy, nefa vorontsiloza iray no nentin-dry zareo nivoaka tao. Nentina avy hatrany namonjy toeram-pitsaboana ilay naratra rehefa lasa ireo olon-dratsy. Tsy misy atahorana ny ainy.