Olona roa no maty voatifitry ny basin’ny miaramila vokatry ny fifamaliana tafahoatra. Ny zoma teo, tamin’ny 5ora hariva no nitrangan’ izany, tao amin’ny fokontany sy kaominina Analaiva, distrikan’ i Morondava. Araka ny loharanom-baovao dia andiana Antandroy izy ireto izay nifamaly teo amin’ny tsenan’Analaiva ka niafara tamin’ny ady. Tsy fantatra kosa ny niandohan’ny fifamaliana satria niditra an-tsehatra avy hatrany ny miaramila roa nanao fanamiana ara-dalàna mitondra basy mba hanasaraka azy ireo. Tsy nampoizin’ireo mpitandro filaminana ireo anefa fa nosintomin’ny iray tamin’ireo mpifanandrina ny basin’ny miaramila iray ka napoakany avy hatrany ary nahavoa olona roa. Maty tsy tra-drano ny iray fa ny faharoa kosa tany amin’ny hopitaly no namoy ny ainy. Manoloana ity tranga ity dia nanao fivoriana maika ny Omc any an-toerana, ny sabotsy lasa teo ary ny androtr’io ihany koa no nanaovana ny fizahana tany Analaiva.