Hisy oniversite ahorina any amin’ny distrikan’i Soavinandriana Itasy ary napetraka omaly maraina ny vato fehizoron’ny foto-drafitr’asa. Noho ny fiaraha-miasan’ny ministeran’ ny Fampianarana ambony sy ny fikarohana siantifika (Mesupres) sy ny kaominina Soavinandriana, izay nanolotra tany, no nahatanteraka ny asa.

Ny fanorenana dia natao mba hanapariahana ny oniversite  sy hamaliana ny fahasahiranan’ny ray aman-dreny sy ny mpianatra satria ahafahana  mandray mpianatra miisa 25 000  isan-taona. Hisy seha-pihofanana 7 ao amin’io oniversite io, ka anisan’izany ny fitrandrahana sy ny tontolo iainana, ny fifandraisana isam-paritany, ny rano sy ny tontolo iainana, ny fitantanana ny tontolo iainana, ny harena voajanahary sy azo havaozina, ny fandraharahana ny “agro-alimentaire”.

Hahazo tombony amin’ ny fanitarana ny oniverstite ihany koa  ny any amin’ny faritra Vakinankaratra sy Bongolava  satria hisokatra ho azy ireo ity toeram-pampianarana ity rehefa vita tanteraka ny foto-drafitr’asa.

Marino Michael