Taorian’ny fanomezam-baovao avy amin’ny olona tsara sitra-po dia hitan’ny polisy ny sabotsy lasa teo, ny lavaka lehibe sahabo telo metatra, izay fanafen’ireo jiolahy ny entana halatra, tao Antsahalava, any Ambatondrazaka. Tena tsy nampoizana fa tao anaty trano iray lehibe tany an-toerana no nisy an’ity lavaka be ity. Farafara lehibe iray ihany no tao amin’io trano io ary tao ambanin’izany fandriana izany nisy gorodona izay nanarona ilay lavaka. Hita tao avokoa ny entana halatra rehetra rehefa napoaka ilay gorodona ka anisan’izany ny vary fotsy amin’ny gony maro be, vata fahitalavitra nivoaka farany ireny efa amam-polony, « lecteur » sy karazan’entana sarobidy maromaro. Tsy tratra tao an-trano kosa ireo jiolahy tompon’antoka ary mbola tsy fantatra ihany koa ny mombamomba azy ireo fa efa mandeha ny fikarohana. Manoloana ny fahitana ity trano fanatobiana entana halatra ity dia velom-panantenana ireo mponina amin’ny mety ahitana ireo mpangalatra, izy ireo izay efa mandry tsy lavo loha manoloana ny asan-jiolahy misesisesy any an-toerana. Etsy

ankilany kosa dia nangataka hatrany ny fiaraha-miasa amin’ny vahoaka ny mpitandro filaminana tsy hisalasala ny manome vaovao raha mahita zavatra mampiahiahy fa vonona izy ireo hanongotra hatramin’ny fakany ny asan-jiolahy. Tahaka ireo jiolahy miray hina dia manana firaisankina sy ny fahaiza-manao ihany koa ny polisim-pirenena, araka ny filazan’ny Inspektera any Ambatondrazaka.

L.N