Ramatoa iray 42 taona no maty tsy nialana nenina rehefa nitsambikina avy teny amin’ny rihana fahatelo, teny amin’ny trano fonenany eny Andoharanofotsy, omaly maraina tamin’ny 4ora. Vokatry ny dona mafy nahazo ny lohany dia tsy tana intsony ny ainy tamin’ny foana nitondran’ny fianakaviany azy tany amin’ny hopitaly. Manana finoana be io ramatoa io ary te-hitsapa sy hampiseho ny manodidina azy ny herin’ny finoana an’i Jesosy ka izany no antony nahatonga azy nitsambikina.

« Nanontany ny manodidina izy raha afaka hitondra azy ny fahafatesana rehefa mitsambikina avy eny amin’ny rihana fahatelo izy na dia eo aza ny finoany tsy azo hozongozonina. Tamin’izay indrindra dia nandidy ny olona rehetra hivoaka tao an-trano izy satria efa tonga ny fotoanan’ny fahamarinana. Nanaraka ara-bakiteny ny voalazan’ny baiboly dia tsy nisalasala nitsambikina izy », hoy ny loharanom-baovao.

Efa olona niala aina noho izany no novonjen’ny havany teny am-pototry ny trano rehefa nirohotra mba hiezaka hamonjy azy. Na izany aza dia tsy nanome antsipiriany mahakasika ny fitondran-tena ara-pahasalamana na eo amin’ny ara-panambadiana ny niharam-boina ny loharanom-baovao. Ny hany vaovao voasivana amin’ity raharaha ity dia mpivavaka  be io vehivavy io. Mety misy hery mifono zava-miafina ve ny nanosika an’ity ramatoa ity nanao izao fihetsika izao ?

Laurena Nany