Nitrangana lozam-pifamoivoizana an-dranomasina tany Masoala, ny alahady lasa teo. Lehilahy telo no natelin’ny ranomasina vokatry ny faharatsian’ny teotr’andro. Botry iray izay tsy fanta-pihaviana hihazo an’io toerana voalaza eo ambony io no nidona tamin’ny vato noho ny tafio-drivotra mahery vaika sy ny fisamboaravoaran’ny ranomasina, rehefa tonga tao Namantoana.

Vokany, nipitika avy hatrany ny lehilahy miisa 3 nipetraka teny ambonin’ny tafon’izany botry izany. Nanipazana tady izy ireo ka mbola avotra ny iray tamin’izy ireo fa ny roa no natelin’ny ranomasina. Taorian’ny fikarohana nataon’ireo fokonolona tany an-toerana dia hita ny faty iray raha toa ka mbola karohina ny faharoa.

Mbola tany amin’ny ranomasina manodidina any Masoala ihany fa tany Vinanivao indray. Lehilahy iray mpitatitra entana amin’ny lakana vohizina no navalan’ny rano. Hihazo any Ambodifotsy izy io no nitranga ny loza ary mbola tsy hita popoka ihany koa hatramin’izao.

Laurena Nany