Dimy lahy nitondra zava-maranitra no nanafika tokantranon’ny teratany Italianina, ny sabotsy maraina tokony tamin’ny 4ora, tao amin’ny fokontany Tanambao Atsimo, any Antsiranana. Mbola tao anaty torimaso tanteraka ireo lasibatra tamin’ny fahatongavan’ireo olon-dratsy. Notapahan-dry zalahy tamin’ny zava-maranitra ny vy fiarovana tamin’ny varavarankely izay nahafahan’izy ireo niditra. Nakorontan’ ireto mpangalatra ambony ambany amin’izay ny tao an-trano mba nitadiavany izay  ho robaina. Tamin’izay indrindra anefa no taitra ireo lasibatra ka norahonan’ireo olon-dratsy hamoaka ny vola. Nilaza tsy nanana anefa ilay teratany Italianana ka novelesina tamin’ny hety be dia vaky loha. Ary tsy vitan’izany fa mbola notapahan’izy ireo ny tananan’ilay vazaha. Naratra mafy izy io ka tamin’izay vao nanolotra vola 180 000 ariary an’ireo jiolahy ny vadin’ilay Italianina izay teratany malagasy. Lasa nandositra amin’izay ireo mpangalatra raha vao nahazo izay notadiaviny ka ankoatra ilay lelavola dia voaroba ihany ny koa ny findain’izy mivady sy ny solosaina entin-tanana. Nentina namonjy toeram-pitsaboana ilay naratra rehefa lasa kelikely ireo jiolahy ary efa nalefa nody rehefa nahazo fitsaboana sahaza azy. Efa mandeha ny famotorana.

L.N