Ny loha vaky vokatry ny daroka, ny vola lasa, raha tsy hilaza ny ratra ara-tsaina nihatra tamin’ny tovolahy iray 26 taona, teny Ambohijatovo, omaly tamin’ny 1ora maraina tany ho any. Tratra alina avy tany am-piasanany ilay lasibatra araka ny vaovao voaray no notsenain’ny jiolahy miisa 5 rehefa nidina ny fiarakaretsaka. “Ny tampoka tsy maha-lehilahy”, hoy ny fitenenana, satria nadabok’ireo dimy lahy avy hatrany izy ka tsy afaka nanao na inona na inona. Nanaparan’izy ireo ny herisetrany amin’izay ny anao lahy ka naratra mafy. Ary tsy vitan’ny naratra fa mbola lasan’ireo jiolahy ihany koa ny vola kely tahiry tany am-paosy. Na dia voa mafy aza anefa izy io mbola afaka nihazo ny trano fonenany ihany ny lasibatra. Ireo tao an-trano amin’izay no nitondra azy tany amin’ny hopitaly mba hahazo fitsaboana sahaza azy.