Nisehoana fanafihana mitam-piadiana tany Ilakaka B, omaly vao mangiran-dratsy, tokony tamin’ny 5ora teo ho eo. Andian-dahalo nirongo basy mahery vaika sy zava-maranitra no tonga handravarava izany tanàna izany saingy niala maina. Nanapoaka basy ireo malaso nikasa handroba ny mponina fa tsy nanaiky lembenana ireto farany ka raikitra ny sakoroka teo amin’ny roa tonta.

Soa fa manana fitaovam-piadiana mitovy tamin’ireo olon-dratsy ireo fokonolona toy ny basy, lefona, antsy lava ka tsy nanano sarotra azy ireo ny nifanandrina tamin’ny jiolahy. Tsy niraviravy tanana fa tonga nanampy ireo mponina tany an-toerana ny mpitandro filaminana araka ny loharaom-baovao. Vokany, malaso miisa 11 no maty voatifitra ary olon-tsotra 3 naratra mafy. Sarona niaraka tamin’ireo dahalo namoy ny ainy ihany ireo fitaovam-piadiana nampiasaina sy ireo ody gasy maro be.

Hatramin’ny omaly tokony 11ora atoandro tany ho any dia mbola nitohy ny fifandonana tamin’ny roa tonta. Andrasana ny mety ho tohin’ny raharaha.

Laurena Nany