Nisandoka ho zandary ny lehilahy iray no tra-tehaka ny polisy eny amin’ny boriborintany faharoa, ny alarobia atoandro, tamin’ny 2ora tany ho any. Nisakafo tao amin’ny hotely iray teny Ambanidia izy io no noraisim-potsiny. Araka ny loharanom-baovao avy amin’ny polisy, tsy nandoa vola ilay ranamana fa hoe zandary. Nisy mihitsy ny fifamaliana teo amin’io lehilahy io sy ny tompon’ny hotely. Tezitra mafy tamin’izany ity farany ka niantso ny polisy teny an-toerana. Tonga noho izany ny mpitandro filaminana ka io tokoa ilay lehilahy miaraka amin’ny fanamian’ny zandary. Nosamborina avy hatrany ity farany ary nentina natao fanadihadiana. Teo no nahalalana fa tsy zandary izy io. Ny fanamiana zandary no voalaza fa entiny misoloky ireo olona sendra azy. Araka ny fanambaran’ny kaomisera Patrick Ralainirina dia efa fanaony hatramin’ny ela ny fisandohana ho mpitando filaminana satria tsy teto an-drenivohitra ihany fa tonga hatrany Tsiroanomandidy izany. Mbola tsy nisazy kosa ity mpisoloky ity raha ny filazany, nandritra ny famotorana azy, ary eny Andohamandry izy no monina. Natolotra ny fampanoavana omaly ny raharaha.

Laurena Nany