Kely ny karama raisin’ny mpampianatra Fram isam-bolana. Misy ary ireo tsy mandray indraindray, indrindra ireo mpampianatra any ambanivohitra. Iray hetsy isam-bolana ny fanampiana azon’izy ireo ary misy fotoana tsy mandray mihitsy. Tsy afenina fa 30 000 ariary no mba raisin’ireo any ambanivohitra isam-bolana. Misy ary moa ireo mikarama daba rehefa tsy misy vola omena azy ireo, ny ray aman-drenin’ny mpianatra ka ireny haninkotrana ireny no atao tsipaipaika omena ireo mpanabe. Miteraka olana amin’ny fampianarana any amin’ny tontolo ambanivohitra anefa izy io indraindray satria misy ireo ray aman-dreny tsy manana vokatry ny tany atolotra ny mpampianatra ka ireo ankizy no mizaka ny vokan’izany satria tsy alefan’ny ray aman-dreniny mianatra.

Nozaraina fifanarahana arak’asa

Manoloana ireo olana betsaka atrehan’ireo mpampianatra Fram sy ny mety ho voka-dratsin’izany amin’ny fampianarana dia notontosaina omaly zoma 5 febroary, teny amin’ny tokontany malalaka ny Lisea Jules Ferry, ny fizarana ny fifanarahana arak’asa an’ireo mpampianatra Fram ireo. Mpanabe 1 400 avy amin’ny Faritra Analamanga izay noraisina ho mpiasam-panjakana tamin’ny taona 2015 lasa teo ireto nomena fifanarahana arak’asa ireto ka olona iray isaky ny sekoly no tonga nisolontena nandray izany tao an-toerana. Toy ny fifanarahana arak’asa rehetra ao amin’ny fanjakana dia havaozina isaky ny 2 taona izany ka 6 taona aty aoriana vao ho raisina mpiasa raikitra izy ireo. Ho fanatsarana ny sehatry ny fampianarana hatrany dia hisy ny sazy hiatra amin’ireo mpiasam-panjakana matotoa, araka ny fanambaran’ny minisitry ny Fanabeazam-pirenana, Paul Rabary.

L.N